Dr legendär Füürabe im Advänt het im 2022 vom Mittwuch am 14.12. bis am 16.12. statt gfunge. Aber dr DKÄ isch natürlich scho vorhär schwär am büglä gsi. Dr Doucher Raphael het dä Summer bis spät i Herbscht inä useme hundskommunä Schibäwäschmittufass es überdimensionaus Modäu vomnä DKÄ-Teetassli gmacht. Kiener’s laggierer heinim dä cheib när no grad wiiss agstrichä. U dr Toucher Sam het dr passend DKÄ Chläber für druf gliferet. Das mir üsnä liäbschtä Chunde no es schönners Wiehnachtswundererläbnis hei chönne biätä, het dr Doucher Raphael ä Näbumaschine u Belüchtig im Tassli installiert. So heimer usem Hüsli chönne Rouch is Tassli pumpä u när het das ä ganz ordentlichi Gattig gmacht.

Hüür het dr Doucher Jonas z erschtä mau ganz aleini dr DKÄ-Sexsuud gmacht, t Basis füre dorfbekannt DKÄ-Glüehwii. Ä repräsentativi Umfrag het ergäh, dass dr DKÄ dr sexxiescht Glüehwii ufem Platz heig gha. Näbscht äm Doucher Simon isch iz auso o dr Doucher Jonas ir Lag di gschmacksgwautigi und beläbendi Essänz z brauä. Für t Kenner heimer oh das Jahr üse Glüehwii miteme Schlühäli Strohrum gbgschmöckt. Ganz wenigi hei das Gwürz aber ghörig ungerschetzt und de hets di cheibä schier us dä Sockä ghoue.

T Après-Märit Partiy mit de Töggelifründe Oberburg isch wieder bi Müller’s im Partychäuer gsi. Di chaute Temperaturä hei aber nid so viu Vouk chönne aalööckä wi angeri Jahr. Jä nu, de hets ömu gnue Bier für üs gha. Mit dä super sexy Glizzerazüg wo dr Doucher Raphael het organisiert isch z feschtä wi vo alleini gange. Z Ufruumä am Samsti Morge isch fasch vo alleini glüffe und när isch di Sach oh scho gässe gsi, für nes Jahr.

T Doucher Silvio, Sam, Joel, Matthias, Raphael, Jonas und Simon hei dr DKÄ-Glüehwii-Stand bewirtet und när ou no grad ar Après Märit Party serviert. Grossä Dank a aui. Es isch wieder einisch grossartig gsi, das Team harmoniert eifach. Und wi dr Doucher Matthias immer so schön seit: „t Sache nume 2x mache, när mues mä sich nöi erfinge“. Und das isch üs hüürigs Jahr glunge, mit däm innovative Tassli – Kudos a Doucher Raphael.

Früsch us dr Grüchtechuchi hani ufgschnappt, dass dr DKÄ plant sich am Stärnä Märit ir Bundeshouptstadt z beteiligä. Und zwar mit säuber zämä schoffiertä Gwürz fürä Glüähwii. Mir chöi auso no gspannt si weli wiudi Idee aus nächschts realisiert wird.

Fröidigscht und mir viiu Blubber

Doucher Simu