Samschti

Am Samschti, em 5. Septämber 2015, hei mir üs i auerhergottsfrüechi ufgmacht, ds bestä Wucheändi sit langem z erläbe. Am 10ni si dr Timo, dr Ruef, dr Schöge, dr Räphu, dr Simu un Ig mitem Touchbus am morge uf Köniz üses bsteute Touchmatriau go hole. Aues isch ribigslos abglofe und so simer de scho gli vouer Vorfröid richtig Thunersee gfahre. Ungerwägs heimer no chli Zwipf kömmerlet, damit mir di kommende Herusforderige ömu de ou guet möge meistere. Mir als erfahreni Toucher hei natürlech gwüsst, dass dr best Touchplatz im Thunersee ds Merlige isch u Bäregg heisst, drum simer schnuerstracks dert häregfahre. Topmotiviert hei mir blitzschnäu üsi Touchusrüstige agleit u si ganz gigerig ufs Touche gsi. Weder dr bewöukt Himmu no ds fiine rägäle hei üs chönne stoppe. Professionel hei mir scho ungerwägs d Taktik für während em Touchgang besproche und üs drufgeiniget gha, Zwöier-Teams z biude aber trotzdäm geng z sächst ungerwägs z si. Das isch übrigens vo aune dr erscht Süesswassertouchgang gsi, aber für routinierti Profis wi üs natürlech nid dr Red wärt.

Womer au im Wasser si gsi, het de Eine z Signau zum Abtouche gä. Scho bim Absinke isch d Sicht deräwä schlächt gsi, dass me nur no knapp di eigete Flosse het gse. Vo gmeinsam Touche het ke Red meh chönne si, me het müesse ufpasse wiene Häftlimacher, dass me dr eiget Buddy nid us de Ouge verlürt. Ds Wasser isch so trüeb gsi, dass me gli weder d Wasseroberflächi no dr Grund het gse. Dr Outor u si Buddy hei nach langem sueche de dr Grund ono gfunge, aber abgse vo Steine u Schlamm hei die Zwe gar nüt gse. Villech hets bi denä Zwenä ono chli drmit z tüe gha, dass si am Vorabe no im Usgang si gsi. Item, wo de dr Touchgang isch verbi gsi hetme de d Erläbnis zäme treit; dr Höhepunkt vo däm Touchgang isch Abfau ufem Grund gsi. Me hetsech de entschide, ke zwöite Touchgang z mache u d Touchusrüstig wieder i Touchbus z verlade. E chli verdatteret u es bitzeli enttüscht simer vo danne zoge, aber mir hei dr Muet natürlech nid verlore.

Eine het di wäutveränderndi Idee gha, di scho bruchte Luftfläschene ir Ämme a üsere Schwelli no ganz go z lääre u di Fläschene richtig us z sugge. Vom däm Ifau si au deräwä begeisteret gsi, dass mir uf diräktem Wäg dert häre gjuflet si. Umzoge heimernis im Schache, nume eine het wägem Kater vom Vortag statt sech umzoge dr Föteler gschnappet u das ganze fürd Nachwäut festghaute. Mit dr ganze Usrüstig und natürlech dr Touchfahne simer z Fuess di letschte Meter schwär bepackt düre Waud gstiflet. D Spannig isch förmlech spürbar gsi, schliesslech toucht me nid jede Tag unger dr Schwelli am Lieblingsplätzli ar Ämme. Di klari Sicht unger Wasser, dr Fischriichtum und di sanfti Strömig hei dä Touchgang zumne unvergässleche Erläbnis gmacht! Fischer, Spazierer u Velofahrer hei vom Ufer us däm merkwürdige Tribe zuegluegt u si usem Stuune nüme usecho. Wo de di Fläschene läär si gsi, isches scho wieder am iidunkle gsi u me hetsech druf geiniget, dass me iz hei giengi go löiie damit am Sunnti d Batterie vode unerschrockene Toucher de wieder vou sige.

Sunnti

Am sunntimorgefrüeh simer mit dr Sunne und em Gekräi vode Güggle ufgschtange und mitem no beladene Touchbus vom Vortag richtig Nöieburgersee ufbroche. Üsi Truppe vom Vortag hei dr Lüdi und d Lisa kompletiert, die Beide hei üs uf Boudry a See begleitet. D Stimmig unger de Toucher isch guet und motiviert gsi, me isch sech sicher gsi, dass es nüm schlechter aus am Vortag i däm Löu-Tümpu im Oberland het chönne wärde. Dr Parkplatz, wo mir üs hei wöue umzieh, hei mir fasch im erschte Alouf gfunge u drum simer de scho gli i vouer Usrüstig am Seeufer gstange. Da mir Füchs d Lehre usem Vortag zoge hei, hei mir d Taktik gänderet u abgmacht, dass hüt no i Zwöier-Gruppe toucht wird.

Chum si mir ungerwasser gsi, heimer erliechteret festgsteut, dass d Sicht viu besser und d Ströimig viu weniger stark weder am Vortag isch gsi. Me isch zwüsche 10 u 20 Meter umetoucht u het paar Fische, es Bootswrack und e grosse Boumstamm miteme montierte Strick dran gse. Bide meiste isch dr Touchgang nach chli meh weder äre haubstung verbi gsi, nur Eine het vor ufregig so fescht gschnufet, dass d Luft chlei schnäuer dus isch gsi. Ufem Parkplatz bim Outo heimer de dr Zwipf igno und üs druf geiniget, no e wiitere Touchgang z ungernäh.

Usemne Touchfüehrer hei mir gwüsst, dass öppe 20 Meter vom Ufer entfärnt e Steilwand isch, die Steilwand het de ds Zieu vom nächste Touchgang söue si. Zieusträbig hei mir üs wieder id Fluete gstürzt und üs ufd Suechi nach dere Steilwand gmacht. Routiniert si mir abtoucht und hei üs plangemäss richtig Steilwand garbeitet und es Spektaku erwartet. Leider und überraschenderwiis hei mir die Steilwand aber nid gfunge, ussert viu Sand und Schlamm heimer vorerscht nüt gse. Ratlos simer wäggschwaderet u heinis drufabe haut a paar Fische und am Gfüeu vom Touche erfröit. Wo d Luft am Ändi zue isch gange simer a Land u hei dört aues Matriau gleitig wider im Touchbus verstout.

Da o di grösschte Heude mau öppis richtigs z bisse bruche, simer du zu Lisa go brätle. I chürzister Zyt heimer e Grillade mit grossartige Salät aus Biilag ufem Tisch gha und hei üs d Mäge vougschlage. Merci a dere Steu nomau ar Lisa! D Crew ohni Lisa und Lüdi isch när im Touchbus richtig Heimat zuegfahre und hetsech gfröit, wiederum hurti ad Ämme go d Fläschene läär z suuge.

I rekordverdächtiger Zyt, fasch aus wäremr im Militär, hei mir üs umzoge u si mit dr ganze Usrüstig über Stock u Stei ad Ämme gsecklet! Ei Gwagli het dä Sprint für nüt gmacht, wüu är sis Blei het vergässe het är wieder düre Waud zrügg dr Bleigurt müesse go hole. Üsi Härze hei vor Ufregig höcher gschlage, üsi Häng si vor Schweiss ganz nass worde: Wo mir di wunderbari Ämme mit ihrem einzigartig blaue Wasser vor üs hei gse plätschere, hets kes Haute meh gä. Mir hei im Wasser gschwaderet und dr Sunntiabe ir Ämme gnosse. Me het nöii Massstäb gsetzt was di töifschti jemaus touchti Töifi ir Ämme betrifft (fasch drei Meter), me isch mit de Foräue um d Ämmechempä gschlänglet u me het di stuunende Blicke vode Zueschouer gspürt u ou chlei gnosse. Es unbeschrieblechs Gfüeu, sone Touchgang ir Ämme a üsem Plätzli!

Während em versorge vor ganze Usrüstig isch d Idee witer diskutiert worde, wo während de Fahrte im Touchbus scho Thema vo Fantasie u Tröim isch gsi: Ä Touchklub z gründe! Euforisiert hei mir zuegstume und sinis einig gsi, aues nötige id Wäge z leite, um dä Touchklub Realität la z wärde.

So isch das Wucheänd vouer Spass, guete Fründe, viu Luft, unvergässleche Momänte und amene nöigründete Klub z Änd gange. Dir gseht, dr Douch-Klub-Ämme isch amene Wucheänd im Septämber 2015 gründet worde u het sini Wurzle bir Ämme-Schwelli bi üsem Plätzli. Aues angere isch Gschicht…